കേരളത്തിൽ ഇന്ന് നടക്കുന്ന ഏറ്റവും വലിയ തട്ടിപ്പ് ഏതെങ്കിലും MLM ബിസിനസ്സോ വെൽനസ്സ് ടീമുകളോ ഒന്നുമല്ല; അത് അബ്രോഡ് എംബിബിഎസ് എന്ന് വിളിക്കപ്പെടുന്ന ഈ വ്യവസ്ഥാപിതമായ ചൂഷണമാണ്. ഒരു കുടുംബത്തിന്റെ ആയുഷ്കാല സമ്പാദ്യവും കുട്ടിയുടെ ഭാവിയും ഒരേപോലെ തകർത്തുതരിപ്പണമാക്കാൻ പോന്ന വലിയൊരു കെണിയാണിത്. ഇന്ത്യയിൽ ഒരു മെഡിക്കൽ സീറ്റ് കിട്ടുക എന്നത് എത്രത്തോളം കഠിനമാണെന്ന് നമുക്കറിയാം. ലക്ഷക്കണക്കിന് കുട്ടികൾ മത്സരിക്കുന്ന NEET പരീക്ഷയിൽ വിചാരിച്ച സ്കോർ കിട്ടാതെ വരുമ്പോൾ തകർന്നുപോകുന്ന മാതാപിതാക്കളുടെയും കുട്ടികളുടെയും ആ മാനസികാവസ്ഥയിലാണ് ഈ ഏജന്റുമാർ കൃത്യമായി വന്ന് ചൂണ്ടയിടുന്നത്. NEET കിട്ടിയില്ലെന്ന് കരുതി ഡോക്ടറാകാൻ കഴിയില്ലെന്ന് അർത്ഥമില്ല, പണമുണ്ടെങ്കിൽ പുറത്തുപോയി രാജാവായി പഠിക്കാം എന്ന ഇവരുടെ മധുരവാക്കുകളിൽ വീണ് പലരും ആകെയുള്ള വീടും സ്ഥലവും പണയം വെച്ചാണ് ലക്ഷങ്ങൾ ഇവരുടെ കൈകളിൽ എത്തിക്കുന്നത്. ചാനൽ മുഖങ്ങളെയും പ്രമുഖരെയും നേതാക്കന്മാരെയും വെച്ച് നടത്തുന്ന വൻകിട പരസ്യങ്ങൾ കൂടിയാകുമ്പോൾ സാധാരണക്കാർ ഇതിനെ കണ്ണടച്ച് വിശ്വസിക്കുകയും ചെയ്യും.
പക്ഷേ, ഈ തിളങ്ങുന്ന ബ്രോഷറുകളിലോ സെമിനാറുകളിലോ ആരും പറയാത്ത കയ്പേറിയ ചില യാഥാർത്ഥ്യങ്ങളുണ്ട്. അഞ്ചോ ആറോ വർഷം റഷ്യയിലോ കിർഗിസ്ഥാനിലോ ഫിലിപ്പൈൻസിലോ ഈജിപ്തിലോ ഒക്കെപ്പോയി കോടികൾ മുടക്കി പഠിച്ച് തിരിച്ചു വരുന്ന ഒരു കുട്ടിക്ക് ഇന്ത്യയിൽ പ്രാക്ടീസ് ചെയ്യണമെങ്കിൽ FMGE അല്ലെങ്കിൽ NExT പരീക്ഷ പാസ്സാകണം. ഈ പരീക്ഷയുടെ പാസ്സ് ശതമാനം വെറും 15 മുതൽ 25 വരെ മാത്രമാണ്! അതായത്, വിദേശത്ത് പോയി പഠിച്ചിറങ്ങുന്ന ഭൂരിഭാഗം കുട്ടികൾക്കും നാട്ടിൽ വന്ന് ഒരു പാരസിറ്റാമോൾ പോലും എഴുതിക്കൊടുക്കാനുള്ള ലൈസൻസ് കിട്ടാറില്ല. പോരാത്തതിന് അവിടുത്തെ കഠിനമായ കാലാവസ്ഥ, ഭാഷ അറിയാത്തതുകൊണ്ട് രോഗികളോട് സംസാരിച്ച് പഠിക്കാൻ പറ്റാത്ത അവസ്ഥ (Clinical Exposure), നിലവാരമില്ലാത്ത കോളേജുകൾ ഇതൊന്നും ആരും മുൻകൂട്ടി പറയാറില്ല.
ഏറ്റവും വലിയ തമാശ എന്തെന്നാൽ, അഞ്ച് വർഷം കഴിഞ്ഞ് കുട്ടി പഠിത്തം കഴിഞ്ഞ് തിരിച്ചെത്തുമ്പോഴേക്കും അഡ്മിഷൻ എടുത്തു തന്ന ഏജൻസി അവിടെ കാണില്ല. ആ ഓഫീസ് പൂട്ടി അവർ വേറെ വല്ല ബിസിനസ്സും തുടങ്ങി കാണും. ഇനി വരുന്ന ആഴ്ചകളിൽ പ്ലസ് ടു, NEET റിസൾട്ടുകൾ വരുന്നതോടെ ഈ ഏജന്റുമാർ വീണ്ടും ഫോൺ കോളുകളുമായും വാട്സാപ്പ് മെസ്സേജുകളുമായും നിങ്ങളുടെ പുറകെ കൂടും. ഒരു അപേക്ഷയുണ്ട്, മക്കളുടെ ഡോക്ടർ മോഹം കണ്ട് വൈകാരികമായി എടുക്കുന്ന ഒരു തീരുമാനം കൊണ്ട് മാത്രം ഒടുവിൽ വലിയൊരു കടക്കെണിയിലായിപ്പോകരുത്. ഇത്തരം ഓഫറുകൾക്ക് പിന്നാലെ പോകുന്നതിന് മുൻപ് FMGE പരീക്ഷയുടെ വിജയശതമാനം ഒന്ന് ഗൂഗിൾ ചെയ്തു നോക്കുക. ആ ഒരൊറ്റ ജാഗ്രത മതിയാകും ഒരു കുടുംബത്തിന്റെ കണ്ണീരും സമ്പാദ്യവും രക്ഷിക്കാൻ
No comments:
Post a Comment